診所職場事 職場 上司 打工仔 返工 職場制勝

診所職場事 【寶豬趣聞】我要上樓|珍寶豬|經一專欄

職場

廣告

經一專欄診所職場事】有日一位女士嚟到診所。

佢行埋嚟問我:「你哋呢度係咪可以寫張證明呀?」
我:「你想寫啲咩證明呀?」
佢:「證明我需要極快上樓」
我:「吓?」

撰文:珍寶豬
佢:「吓咩啫?一睇就知我係精神病人啦下話?」
阿小姐呀,我又真係未見過有人咁鍾意標籤自己係精神病人嘅~
我:「呢啲你有睇開嘅醫生嘅嘛?應該搵返你嘅醫生跟好啲啊,我哋普通科出唔到呢啲證明俾你」
佢:「等得嗰個醫生嚟,我跳樓死咗啦!我要即刻上樓呀!」
我:「我哋真係寫唔到俾你㗎」
佢拍枱:「係咪要我即刻死喺你面前呀?你做擔保人俾我上樓囉,你打去同社工講我要上樓,你打去同差佬講」

我:「你冷靜少少先…一係我同你登記先,你講你情況俾醫生知,睇吓醫生有咩幫到你呀?」
佢:「你哋唔俾層樓我,我就死俾你睇」

…頭先都係講緊證明信,咁快就加碼加到一層樓啦?
我:「你俾身分證我登記先呀,好冇?同埋你頭先話你有覆診嘅,你介唔介意話俾我知係睇緊邊位醫生呀?」
佢:「….身分證?要身分證㗎?」
我:「係呀,睇醫生係要身分證㗎,寫證明嗰啲都一定要身分證㗎~你有冇帶?冇嘅可以返去攞返再過嚟啊。」
佢:「唔係扮吓痴線嘅就有張證明㗎咩?我見啲人係咁講㗎喎,嗌吓跳樓扮吓痴線就快啲同大啲嘛,唔係你呢間咩?佢哋冇話要身分證喎,俾身分證你你咪知我係邊個囉?」

我:「…唔係我哋」
佢:「你知唔知係邊間呀?」
我:「…唔知」
佢:「咁好啦,我再去問清楚先」
…原來而家上樓靠扮痴線㗎?