【內地遺產繼承】小心中港法律差異！大陸買樓要諗遺產繼承｜1%Anthony

親戚： 外婆間祖屋要辦申領手續，需要你返來幫忙…
筆者： 帶乜嘢文件？隨時返嚟做手續？
親戚： 唔止你呀，你爸同所有兄弟姊妹都要返。
筆者： 吓？咁複雜…我哋唔打算要，交俾你代辦得嗎？
親戚： 唔得架，你哋唔親自返嚟，間屋就唔郁得唔賣得…
筆者： 應該要一早準備好…

撰文：1%Anthony｜圖片：中新社、新傳媒資料室

大陸房產繼承手續煩？

分享一個慘痛經歷…關於大陸的房產繼承，想投資大陸樓的朋友要留意！大陸的房產的繼承，跟香港都有很大分別，如果唔識處理，萬一有事，好煩！好痛苦！如果識得未雨籌謀，其實又唔係好複雜！

話說外婆去年離世…留下一間祖屋，在東莞…祖屋已經接近60年，日久失修，再加上當年這裡只是一個小農村，家家戶戶都是自己起屋，即係點？即是沒有嚴格的質量標準，大家都係睇餸食飯，有錢就起靚啲，冇錢就簡陋啲，總之睇落唔會冧，村長同村民都OK就冇問題。

當時是60年代，國家仲未改革開放，個個窮到褲穿窿，有瓦遮頭已經好巴閉，仲講乜鬼嘢Quality丫！其實大家都好耐冇返過去…十幾廿年前，家鄉的親人開始搵到錢，個個都搬晒出城區，呢間祖屋只係俾老家有需要的親戚朋友住，近日因為要辦遺產繼承，所以重臨舊地，回想起兒時跟表哥表姐在祖屋的生活片段，家裡養的雞隨屋走，天台放煙花放炮竹，大家想當年，不亦樂乎。

不過講還講，行入屋內真係一步一驚心，除了幾幅主力牆用磚砌，其餘都是用木，搭建了三層，行上樓梯、樓上房間，傳出「吱吱」聲的怪聲，搖搖欲墜，阿姨不其然大叫：「唔好咁多人行呀，一個一個行呀，唔知會唔會冧架！」即使牆身都有裂痕，瓦頂當然穿窿。

申請重建？失敗！…賣？更加唔使旨意！就是遺產繼承的問題，外婆生前冇做好準備，申領唔到！話說在大陸，房產是家庭制的，無論是老公定老婆買，資產都是屬於他們兩個人的，就好似長命契咁，廿年前外公過身，業主就變成外婆，去年外婆過身，業主就是外公外婆的幾個兒女…

原組合：舅父 (1/3)、阿姨 (1/3)、家母 (1/3)

原本由他們幾個辦手續申請認領就可以…然而，家母早兩年不幸因病離世，根據當地房管局官員所講，家母的1/3部份，就自動成為她的家庭成員的資產，即是家父、我、我兩位弟弟，現在業主就變成…

新組合：舅父 (1/3)、阿姨 (1/3)、我家 (1/3)

即是：舅父 (1/3)、阿姨 (1/3)、{家父+我+弟弟+弟弟} (1/3)

如要重建或者出售，就要所有業主回去公證及簽名！原本三個業主，現在已經變成七個，如果拖住唔做，萬一將來這個新組合之中，又有成員不幸離世，又會再繼續延伸落去，隨時變成十幾個業主，成村人返鄉吓簽名，仲煩！如果其中有些成員已經居海外呢？如果有些成員已經冇聯絡呢？點返？咁間祖屋點算呢？官員說：「冇辦法喎，由得佢冧囉！」

內地遺產繼承要咩文件？

搵齊人返家鄉的公証處辦手續只是第一關。搵齊証明文件也是高難度的一環。例如外婆與家母的關係如何証明呢？當年在鄉村那有出世紙？如果返唔到家鄉，可以如何處理？香港可以委託律師代辦，在大陸並不流行這種做法，親人說可能因為太多做假、爭拗，大陸甚麼事情都流行公証，要親身到公証處，在政府的職員面前核實簽名，甚至要拍照錄像作證明，親戚說，有些案件，資料不足，要搵很多文件證明，再加上大陸樓本身唔貴，費用隨時貴過間屋！

所以，在大陸有房產，一定要做好遺囑！不是隨隨便便搵張紙寫就得，大陸太多做假的案例，必須要搵合資格的
律師，跟足政府部門的要求，辦妥相關的文件及素材，即使你仍然很年輕，但亦要有備無患，始終大陸樓升得利害，正如之前我們買的大陸樓，幾年前買的時候才6、70萬，現在已經200多萬，唔做好安排，萬一有事申領唔到就麻煩了。

我們的大陸兵團，當然有法律支援，幫戰友們都做好保障。如果你自己都有買大陸樓，就要留意了。