想買車仔? 人工要幾多先好諗?

想買車仔? 人工要幾多先好諗?

以前啲人成日話,做人要有「四仔」:屋仔、車仔、老婆仔、BB仔。不過,根據政府統計處數據,2015年就業人士每月收入中位數只有15,000元。人工低儲不到錢買樓,無樓又無老婆仔、BB仔,有些人就寄望養架「車仔」。

不過百物騰貴,今時今日車位不斷被炒高,停車場費亦都唔平,再加埋油費、隧道費、牌費、維修費、保險等開支,加加埋埋隨時可以供層樓。究竟養車一駕車,人工要有幾多先好諗呢?

撰文: Jackie

返工駕駛

以家住沙田中心,到鰂魚涌太古坊返工,以28歲男性、駕駛經驗4年為例。購入一部HONDA JAZZ,連稅後全新價格為18.8萬,按慣例付一成首期,餘下9成分36個月付清,以實際年利率3.21厘,每月供款4,722元;購買綜合保險,全年保費約1萬元,平均每月供款833元。

連同停車場費(沙田中心月租$2,300、太古坊停車每小時$17,星期一至五每天停泊10小時)、油錢(每公里約需$1,每天來回38.8公里)、隧道費(大老山隧道$20及東區海底隧道$25,每日來回$90)、牌費($3,929一年),一個月養車開支最少超過14,000元。若然不好彩慘食「牛肉乾」,開支又再大些。

若是與家人同住,家用$5,000,日常洗費(包括食飯、保險、購物等)$6,000,人工最少要有25,000元才負擔到養車的洗費;然而,若果是租屋住,當租金佔收入4成,每月收入最少要有38,000元以上,方有能力負擔。若然有小朋友,還要預多一筆洗費,月入沒有40,000元以上,千萬不要想開車返工。

假日駕駛

若果一心只是做Sunday Driver,假日同家人伴侶去玩,養車洗費自然較低,至少停車場費可以節省一大筆。若能好好利用商場免費泊車優惠或多使用路邊咪錶位,停車場費可只計算月租固定車位(沙田中心$2,300);油錢粗略估計為$500左右;隧道費取來回$40為例,每月養車開支大約9,000元。

同樣,若與家人同住,每月給予家用$5,000,日常洗費$6,000,每月收入最少要有20,000元先好諗養車;若是租屋住,人工最少要有32,500元以上,方好考慮買車。

當然,上述假設仍有很多變數,例如閣下可以考慮購買數萬元一部的二手車,慳回供車費,不過二手車要預維修費,這筆費用可大可小,小則數千,大則上萬。還有每年一次的驗車費用。

另外,若然閣下無需過海返工,油費及隧道費可每月慳多2,000元左右,不過若然閣下是住大西北地區,例如由官塘至元朗,距離便足足有50公里,每日來回便是100公里。雖然閣下可慳隧道費,但油費卻慳不了。所以建議養車開支還是預鬆少少好。

總括來說,就是想做車主,無租樓、供樓或子女負擔的,最好要有20,000月入,若然有的話,最好月入超過30,000,先至好諗。

伸延閱讀:
【月入11,000元新鮮人 如何實戰儲到10萬元?】
http://www.edigest.hk/Vip/detail?id=6702
【信用卡Min Pay陷阱 借4萬變還15萬】
http://www.edigest.hk/Vip/detail?id=6512
【港家庭平均月花$27600 生活質素會係點?】
http://www.edigest.hk/Vip/detail?id=6611