月入15K 合資 投資 龔成信箱

28歲月入15K 兩年內結婚 與男友合資4,000元投資 買乜好|龔成信箱

投資

廣告

【投資】今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題。

撰文:龔成 |圖片:新傳媒資料庫

1.合資4,000投資

龔成老師,您好!我有幸喺fb睇到你個page,得到好多啟發,喺買你嘅書睇之前已經急不及待想問左你嘢先,因為我知道投資係愈早儲備愈好,但無奈自己情況有點差,雖然您成日話遲起步唔緊要,但希望你睇到我個個案後唔好嚇親…

小女子今年28歲,之前用左1年時間還左$130k卡數(上一份工月入$18k),岩岩轉左工做緊文職,月入$15k,卡數要找埋呢兩個月每月$7.5k,不嬲每月俾家用$3k、危疾$850、月儲$1.5k,其餘為自用+雜費,現手上只有$10k現金。

因為真心想要私人空間賺多啲錢(而家與家人住公屋,想有自己空間做手作去賣),黎緊6月會同男朋友搬出去住,月租$9.8k,男友月入$25k

一齊住後會以每人月入百分比去share開支同儲錢結婚,每人每月收入10%會夾份投資($4k)、20%會夾份儲起($8k)、70%為房租雜費及各自開支($28k)。

扣除必要開支後,其實我只有$4.5k可自用,但6月起自己仍要每月找$3.5k分期(部分是車費、電話費及保險)到2019年8月先清完分期(不計車費、保險要繼續俾),另仲有$850的危疾,可說是所剩無幾(已經無家用可俾)。

所以唯一方法只能開源,希望文職的穩定時間及較多假期可令自己做些手作或接freelance做而賺多舊錢。

背景交代完,其實是想問老師,如果我們每月只用$4k投資是否太少?應該儲幾個月買一手股還是月供股票?

如果我們把另外每月儲起的$8k再分$4k(共$8k)去投資會否好一點?如果真用了每月可儲的$12k的2/3($8k)去投資,會否到我地要結婚既時候?唔到錢出黎?(預計19年尾或20年結婚)

唔好意思,可能我問左好蠢的問題,還請老師耐心解答

我都知自己以前亂咁簽啲卡數分期又大洗又唔儲錢搞到每個月都還唔晒所以爭下爭下爭到條數咁大,但我係過去一年已經好努力地還卡數同埋改變左自己嘅理財習慣同觀念

知道現金只會不斷眨值,所以想就算少少地都要開始學投資,希望自己將來唔好成為小朋友既負擔之餘亦係對自己負責任,請老師您不嫌我長氣同埋太窮,請賜教。

龔成老師:

你過往的理財的確有問題,但你這刻發覺,都算是好事。

你應該慢慢建立一套好的理財模式,不用信用卡,就算要用,也要月月清卡數,不要一直拖,因不斷拖是很差的做法,你會有好重的利息成本,同時好影響將來資金的運用。

因此,你要盡快清還卡數,之後要以收入對支出的模式消費,同時加強儲錢。

搬出去住要比好貴的租,這會對你的財政壓力增加,除非,你好確定,搬出去住之後,到創造比租金更多的收入。我相信,這亦是一個推動力。

你除了要整理自己的理財外,增加收入亦是非常重要的,這方面只要強加,你的財政會有好大改善。

投資方面,每月投資$4000雖然較少,但都是可以進行的,你最好以一邊投資,一邊儲現金的模式進行,即是你在不斷投資的同時,都要儲下現金。

現金除了可作備用之外,亦可以等大市下跌時,把握買平貨的機會。

你可以用每月$4000月供股票,最簡單就是供盈富(2800),這可以幫你保持財富增值,長遠對你地有利。

這刻就先以上述方法進行,到你日後有更多的收入後,再加大投資的部分。(對照龔成信箱:Q5470)

2.中廣核電力(1816)

你好。本人朋友於2015年 用平均價$3 買入1816中廣核 3萬6千股及平均價$2.8 買入 1508 中國再保 3萬5千股。

現在應如何部署? 此兩股有否大潛力? 謝謝。

龔成老師:

記住,持有一隻股票與否,買入價不是重點,這企業的質素及長期的發展前景,才是減定的核心。

中廣核電力(1816)本質不算差,但2015年這股被熱炒,因而令當時股價被高估,現時要上翻去不是短期事。這股不是無質素,可以持有住先,但就要有耐心,先等到之前的價位。

中國再保險(1508)質素只屬中等,比起壽險這些業務,再保險並不算是好賺的業務。這股的股本回報率也只屬10%以下的水平。

由於不是無投資價值,所以這股都可以持有,但質素只屬一般,不要有太大期望,現時估值合理,我相信中短期都未必上翻去,要有耐心。(對照龔成信箱:Q5464)

3. 月供盈富(2800)

老師你好…….想請問一下 月供股票是否 2800 比起其他較好,如果係咁我唔會月供其他股。

因為佢都包括左 HSI 股 而已自動剔除唔好既股,姐係包含曬大藍。

龔成老師:

月供盈富(2800)是最好及最簡單的,因為這已是一個50隻質素不差股票的組合,你不用再選股。同時已有風險分散的作用。

因此,長期月供盈富是最好的。

通常做月供股票,如果無選股能力,就會全供盈富。至於有一點選股能力,就會以月供盈富作為核心,同時供其他睇好的股票。(對照龔成信箱:Q5465)

4.卡數

你好!我係你80後百萬富翁的讀者,但我係90後。

我有個問題困惑中想請教你,我而家月入2萬,有$3xxx分期卡數,其餘都是一些家庭必要開支,每月所剩無幾,而卡數大概仲有2-3年要還,一次過付清要2萬多。

睇完你本書後想盡早清還卡數無負債並投入長期?價值投資,我應該留有流動資金作投資還是一次過清哂卡數?

卡數中間有?仲有1年就還清,有啲就最盡去到3年。

龔成老師:

由於卡數的利息成本一般都好高,所以盡快清還是較好的。若有一筆資錢,我地會考慮:還錢?持有現金?投資?當中會比較利息成本,以及投資回報率,如果投資回報率遠高於利息成本,將錢投資是較好。

但卡數一般的利息成本都好高,所以,你應該盡快還錢。然後儲些現金作流動性備用,之後再投資。這是一個一步步的過程,不能急。

這刻的你,盡力減少支出,盡快還清卡數。同時,你可以把握這段時間,好好提升自己的投資知識,到之後投資時,就可提高回報率。(對照龔成信箱:Q5466)

延伸閱讀:《財務自由行》第10回 不能說的秘密:財富真相 (下)

5.月供股票

老師,我睇過你啲 post話月供股票係平分左啲風險 但有冇話供幾耐架?

龔成老師:

一般來說,都要供3年以上。月供股票能有效分散風險,原理在於不同的買入價,由原本只有一次的買入價,分散在多次的買入價,你就可以避免在高位買入的風險。由於股票高位的週期可持續一、兩年,因此,月供3年會較好。

如果可以的話,供更長時間會更好,因為這是一個好好的持續累積優質股過程。

月供後,最好長線持有,起碼5年,愈長愈好,只要股票優質,無必要賣出。(對照龔成信箱:Q5467)

6.香港電訊(6823)

想問下成哥 我有30萬流動cash 港燈冇得月供 如果想買收息 跌幾多買一次?

6823 現價買多啲可以買嗎? Thx

龔成老師:

如果港燈無得月供,那就用時間平均法,即是按你的財政情況,每隔一段時間入一個數目,例如每3個月入2手。基本上,港燈在$7.5左右的水平,都可分注買入。如果真的到$6.7水平,息率就有6%,好吸引,可以加大手數。但如到去到$8,就要停止買入了。

香港電訊(6823)同樣是不錯的收息股,但由於電訊業的價格戰,有可能令佢股價有少少波動,因此,用分注買入的方法較好,不用刻意買多d,平均去入就得,除非跌好多先大手。而現價已可分注。(對照龔成信箱:Q5468)

延伸閱讀:貪字得個貧 $150萬化為烏有 拆解金錢騙局的模式

7.藍鼎國際(0582)

老師你好,小弟23歲月入2萬,每月最小儲1萬,但只靠人工很難儲錢

而加想儲多啲錢,大約有十多萬,想問下136.582同3800你點睇,而你又對我理財有咩意見呢.

龔成老師:

每月能儲$1萬已經不差,你保持這個儲錢的速度,同時,要善用投資,平衡令財富增值。

恒騰網絡(0136)雖然有潛力,但這股的不確定性好大,因為佢而家未有盈利,但市值去到幾百億,大過好多公司,市場只是憑「預期」去推斷這公司值幾多錢,而這個「預期」可以變得好快。這股要較小心。

藍鼎國際(0582)過往5年有4年虧損,加上多次進行供股合股,是典型的財技股,投資這股要好小心,股價可以升得好勁,又可以跌得好勁。

保利協鑫能源(3800)質素不過不失,長遠發展都算不差,都算可以投資。現時股值不算貴。

記住,投資不是炒賣,是將財富合理增值,上述股票都是散戶喜歡的股票,短炒味較濃,但我從過往工作經歷明白,凡散戶熱炒過的,往往都無好結果。

建議你月供一些穩健如,例如盈富(2800)等,對你財富增值較好。(對照龔成信箱:Q5469)

8.買股票

老師,若有資金唔只$100萬,應該以資金多少%黎買股票?

我現在短期目標是買樓,所以留有大量現金在定期,同時100萬投資了日本樓收租,140萬買了儲蓄保驗備用。遲些筆定期就過期,屆時應留有現金等樓價跌?

應該留多少?定可將大部份資金都買股票呢?

龔成老師:

如果你短期目標是買樓,一定要留「足夠首期」的現金為先,這部分集中在現金,不要投資。這些資金唔好「短炒一轉」去賺錢買樓,因為這是高風險行為,總之,首期就要預留現金。

而餘下的部分,即是「閒錢」,先可以做投資,先可以作長期增值。我假設這部分的錢是$50萬,你可以將其中的$30萬,分注買入穩健股票,長期增值。至於餘下$20萬部分,則作等大跌市備用。(對照龔成信箱:Q5471)

延伸閱讀:好想十年後退休月供$5,000買盈富港鐵建行中銀 好嗎

9.中東國家

你好,新手最近投資在個基金 主要成份為40%中國市場既股份 30%科網 30%醫療

若股災在一兩年出現會有影響嗎?  另外多問 中東國家值得投資嗎?

龔成老師:

上述基金的風險較高,但如果你是年輕人,加上這基金只佔你財富組合的一部分,那就無問題。

若股災在一年後出現,會對基金的價格受影響,可能會下跌一定程度,但只要你是長期投資,價格總會慢慢上升。只要基金所選的都是有質素的企業,長期就會增值,股災對企業的本質無影響的。

中東國家都有投資價值,但不建議佔你投資組合太多。(對照龔成信箱:Q5472)

10.維他奶國際(0345)

成哥, 345係我一直都想買,但PE34好貴,佢每股盈利$0.59咁少,但又可以股$都平穩上升,我咩$位先可以入?前景看好?

同埋2778,PE得2.9係埋值得入多啲?

龔成老師:

維他奶國際(0345)的市盈率去到30倍以上,的確不平宜。這股有質素,過往的生意與盈利有不錯的增長,但你說得對,這股的業務只能平穩上升,以現時的估值計,點都偏貴。

這股前景正面,但就只會平穩增長,所以太高的估值未必承受到。最好等回到30倍市盈率以下,才開始考慮,到時最好仲要分注,因為的確不平宜。

冠君產業(2778)是房託,由於佢的盈利會包括了物業公平價值的重估,因此是無意思的,當盈利數字變到好大,市盈率數字就會變到好細。

因此,我地唔會以市盈率作衡量指標,而會用股息率等其他指標作準。現時股息率約4.5%,吸引力中等,都算可以分注入。(對照龔成信箱:Q5473)

去大阪想搵住宿?識睇一定睇呢到!

去首爾掃貨住邊好?入嚟幫你格價搵至抵住酒店!

短trip遊台北叉叉電,即訂平、靚、正住宿出發!

去旅遊想搵住宿?識睇一定睇呢到!

延伸閱讀:

90後唔做律師創業印卡片 10萬本3個月回本 每月生意額近百萬