搬入將軍澳12年 返工好方便住一世都願

職場

廣告

我以前住灣仔,唔係話唔好,其實好方便,落街乜都有得食,買嘢行街行路落銅記都相當方便。尤其中環金鐘返工,真係放飯返屋企食都仲得。之但係自己唔係有錢人,住灣仔舊區,唐樓果隻,住唐 7 樓,每日返工放其實幾甘。

文:不羈

圖:Thinkstock

加上幾十年樓齡,打風落雨漏水唔在講,廁所成日無水又唔夠水力,真係好唔方便。加上樓價同租金真係唔係平。
12年前,將軍澳有新樓盤,查實將軍澳新盤入伙從未停過,我知好多人嫌將軍澳人多人多又人多,而且每個站一個大商場,賣嘅食嘅都一模一樣﹐無晒特色。
之但係,住將軍澳其實真係有唔少好處。啲樓新啲,樓價又平啲,起碼住得舒服啲。

至於你話個個站商場一模一樣,但又咁講喎,打風落雨唔洗怕,樓下實有嘢食,又真係幾方便。你講得啱,啲嘢係貴咗啲,買個生果都唔平得去邊,唔好忘記,家陣香港消費有邊度唔貴先?我哋呢啲升斗市民,乜仲有得揀咩?但求有個瓦遮頭,已經心滿意足了。
況且,沿線有港鐵站,無論去東九或港島東其實都好方便。放假想輕鬆一吓,響坑口坐駕VAN仔,半粒鐘唔洗就入到西貢。
真心講句,我搬入將軍澳12年,真係住一世都願。

將軍澳人另一些心聲,搭車的騰折只有將軍澳人先會明。
冇嘢嘅,呻吓啫。小弟住響將軍澳成廿年,由佢冇港鐵年代,日日坐巴士由將軍澳往返北角返工開始,一直住到家陣。
響冇港鐵嘅年代,遇著打風落大雨,一定塞車塞到暈,試過一次三號風球塞咗成兩粒鐘,咁啱放工前又冇去廁所,真係急尿急到爆,又冇得落車,果一刻,真係好想有個膠樽響手,就地解決。

好啦,終於守得雲開,有港鐵坐啦,小弟屋企都叫做靠近站口,初時係幾好嘅,出入返工放工的而且確係方便咗好多。 
可能因為咁,將軍澳就愈住愈多人,加上啲地產佬起完一幢又一幢,好似一夜之間,成個將軍澳都係人啊人啊人啊!

一到假期,諗住去商場求其搵間餐廳食過飯啦,唔係講笑,輪番一頭半個鐘冇走雞。

好啦,都算,最慘係當康城站開咗,我哋呢啲住寶琳嘅人就慘咯。每次響調景嶺一個唔留神,就會入咗去康城嘅車。由調景嶺一直去將軍澳都大安旨意,一路碌手機,直至佢廣播話「下一站康城」,我先至賴野。
無可奈何惟有賴死唔走坐到佢原車出番將軍澳站啦,見對面有車嚟,又見有人入,我梗係第一時間衝入去啦,以為好快就可以返歸。
點知……媽呀!點解又係去左康城架?來回康城又折返將軍澳嘅痛苦,就好比來回地獄又折返人間咁慘情。

延伸閱讀: