高鐵超支,不如幫希臘還債?

樓市

廣告

朋友: 「嘩!高鐵超支幾百億元。」

筆者: 「超支就預咗,估唔到差咁遠。」
朋友: 「又係要納稅人埋單……」
筆者: 「政府俾錢,有得洗,梗係盡洗啦!」
朋友: 「乜可以係政府俾架咩?」
筆者: 「當然得,機構俾錢,政府用幾十年經營權找數。」
朋友: 「幾百億元喎,夠咩?」
筆者: 「如果唔夠,咪俾埋上蓋發展權佢,實夠!」
朋友: 「可能政府覺得上蓋發展權太值錢,唔捨得俾。」
筆者: 「都有可能,要問炳哥(編按:運輸及房屋局局長張炳良)先知。」
朋友: 「網上好多人話不如停建。」
筆者: 「唔係嘛?!咁都得?」
朋友: 「有個學者建議起乜鬼地下商城添。」

筆者: 「咩學者嚟架?有商城,冇交通,搵鬼去咩?」
朋友: 「仲有人話,起高鐵筆錢夠希臘還債。」
筆者: 「咁又點?」
朋友: 「不如幫希臘還債,唔使歐洲年年咁煩!」
筆者: 「傻架咩?!幫賭仔還債?仲要係無底深潭。」

高鐵超支又超支,無端端又再成為城中熱話。筆者明白好多朋友都好憤怒,不過憤怒還憤怒,不要失去理智!

最近就有位乜乜組織召集人,聽聞是一位工程師,建議港府不如停建高鐵,稱北環線連接西鐵,可取代高鐵,又稱可將已發展的數十萬平方呎地下面積發展成為地下商城,經濟效益可能仲高云云,明顯他只從工程角度去分析整件事,筆者認為非常敷淺。

北環線可以取代高鐵嗎?

北環線連接西鐵,只是香港範圍內的事。高鐵的意義,是連接全國,大陸計劃以高鐵貫通全國重要城市,即所謂四縱四橫,高速鐵路網絡令城市之間可以有更緊密連繫。香港還不夠孤兒仔嗎?還要進一步孤立自己嗎?該工程師建議只會「益了」深圳,被深圳北站截斷大量商機。

地下商城效益更大嗎?

商舖商舖,有商才有舖,如果只興建大大個商場,沒有基建,例如交通網絡、商廈群、住宅群配合,商城只會變成鬼城,大陸有很多。如果最終高鐵停建,筆者建議可以發展高級商業區或者豪宅區,九龍站旁邊再多一個九龍站,是否需要地下商城,就按社區人口發展而定。

幫希臘還債?咪玩啦!

如果有個賭仔朋友,次次問你借錢還大耳窿,誓神劈願話以後斬手指戒賭,轉個頭又爭一筆,你會唔會借俾佢?希臘有何分別?擺明係借錢唔還,又唔接受緊縮政策,你幫佢還咗一次,咪又係繼續大花筒,過兩年又問你再借,呢啲先係真正無底深潭!

基建發展要有長遠眼光

基建發展的效益,是需要有長遠眼光才看到的。回顧一下,當年的玫瑰園計劃,被罵得狗血淋頭,如果沒有赤臘角機場,今天會怎樣?西鐵通車之初,乘客只有小貓三兩隻,又被亂箭狂插,今天再搭西鐵,看看沿途大量房屋供應,又有何看法?

以筆者所見,高鐵是目前最重要的基建項目,一地兩檢當然要解決,車上辦手續,或在深圳北站辦手續,筆者都不反對,最重要令香港與全國主要城市接軌。

超支問題,當然要解決,多花的幾百億元,就在高鐵站範圍多開發幾幅貴重土地吧。如果沒有,就調高上蓋及周邊土地的地積比,賣地賺番。

所謂專家,有幾多人有長遠眼光?所謂政客,有幾多真心為港?可以預期,高鐵項目將會繼續成為專家、政客抽水的重點。專家、政客已經夠短視了,作為香港人,我們要有長遠目光。

加入經一Patreon即睇VCP股單

每日只需~$2.5 大量文量無限重溫

全新訂閱計劃內容將全面升級!最新欄目利用Python程式配合《超級積效》Mark Minervini VCP選股法為你搵出市場潛力股!


現成為經一Patreon會員限時尊享85折!訂閱後即可瀏覽股單,更可學習程式交易和參與會員Live Chat。