升市係咪即將完結 股市到狂熱程度未 | 龔成信箱
撰文：龔成 ｜圖片：網絡圖片
1.個市狂熱未
請問龔成有方法去計個市是否狂熱程度嗎
可參考的咩數據
龔成老師：
你可以根據股票班，有一堂講買賣時機，賣出時機，正是分析狂熱程度，當你見到課堂上的指標，中得愈多，同時愈明顯，就是愈狂熱。
例如成交不倍創新高，同埋全民皆股，有人辭職炒股，好多散戶賺錢。就算只計呢幾個因素，現時都未中晒，散戶賺大錢的唔係好多。
同埋，市盈率現時約17倍，而恆指歷史市盈率約為8倍至24倍，現時不算好貴，加上今次的升市，其中一個原因是企業盈利帶動，這是實在能支持升市的因素。當企業漸漸公布業績，如果盈利有實際上升，恆指的市盈率就會下跌，估值變得更為合理。
2.0700可月供？
你好，其實騰訊這些高價股，是適合一手買入還是適合作月供？
以現時市價，我就算每月供$2000騰訊，供兩年都未供夠一手。謝謝解答
龔成老師：
這類股，月供較好。
因為這類股現時在高估值，一次過買入，其實風險較高，但這股又有潛力，所以如果你買入，最好就是利用「有效的分散風險」，作為投資的策略。
雖然現時股價不平，但只要長期地分散，買入價就能有效平均，風險能以減少。
3.碎股點處理
你好呀，睇你的文章學習好多知識
請問我用中銀月供股票，我今日賣388的時候，佢一定要我係100股的倍數，但我係月供，唔係100股的倍數，剩下應該點賣出？
龔成老師：
港交所（0388）的每手股數是100股，即是你買賣都要用這個或其倍數去做。餘下的叫「碎股」，碎股都可賣出，但要特別處理，一般賣出價位會比現時市優低少少。
不過，你係月供股票，而不少銀行都提供「月供的碎股，可以用正股價賣出」，因為佢地都知，月供股一定會有碎股。據我所知，中銀都有的，但你要特別打電話比佢，叫佢特別同你做先得，但如果你而家已賣出部分，再賣另一部分時有可能要收多一次手續費。
4.課堂一問
老師，次次你的股票班都唔岩我時間，無奈。
龔成老師：
希望遲些在課程見到你。
在這段時間，都要保持提升投資知識，因為這些知識，你愈早得到，財富就愈快得到增值。
5.比亞迪爆炸事件
成哥，課堂聽到你講過比亞迪爆炸只係短期波動因素，是買入時機。
如果SAMSUNG電池爆炸事件，係咪都可以用同一個諗法? 因為SAMSUNG單野相比起比亞迪好似影響大好多。謝謝!
龔成老師：
SAMSUNG單野會大好多，因為佢的產品要大量回收，但比亞迪（1211）當時根本就唔洗做，同埋比亞迪只是單一事件，心理影響較多，而SAMSUNG是好多單爆炸，影響較全面。
所以，SAMSUNG該次事件對佢的影響，是較為中期及廣泛的，所以對企業有較實質的影響。不過，我認為這事件都是「可解決的」事件，如果企業因股價大跌，就是買入時機，但要有相當的跌幅才會買入，因為佢比起比亞迪之前的影響，影響較實質。
6.44歲單身有樓投祺點部署
龔Sir您好！一直有拜讀龔Sir著作, 現碰上人生低潮位, 請求龔Sir可俾?意見…
44歲單身, 無專業學歷, 讀到中三, 做sales拚搏至今已有廿餘年, 從不懂投資…父母亦於年前相繼離世, 幸得父母遺產三十萬加個人積蓄於7年前尾水成功上車買入層樓作自用
拼命辛苦供款後, 現尚欠80餘萬供款, 有覺而家份工不太穩定, 隨時有被裁危機(有幸拜讀了龔Sir的著作: 財務自由行中第七章?的一篇文章, 遂於一年前將層樓租左俾人，自己租住80呎擋房, 月租$4,800…希望以此開步向龔Sir學投資, 懇請龔Sir不吝賜教, 感激感激!
請問龔Sir:
我應該如何將層樓供款重心移離? 是否要重新做按揭, 供樓佔少數錢, 將錢用來部署投資股票？(因我之前將大部分錢都放晒入去供樓, 現時只有10萬現金同兩份好早年供落退休保險, 每份30萬, 到65歲欏返兩份都係得60萬…但cut又可惜, 唉…)
龔成老師：
其實你能在之前置業，以及現時識得將物業放租，而自己能住較少的地方，在理財方面其實都算不差，反而我覺得你應該正面一點。
加按物業是一個方法，但在時機上，這刻未必是最好的時機，首先，利息開始加，加按原理是借更多的錢，而這個借貸成本正上升，有少少風險的。
另外，加按後，你能得到一筆錢，但這筆錢投資甚麼？現時的股市不算平宜，我大多叫人在這時，只能月供。所以得到的錢，這刻較難穩陣地運用。
另一點，加按買資產，是創造財富的方法，但前提是有一定的投資技巧，這點你自己評估。同埋你工作如果略有不穩，這做法是有風險的。
總結來說，上述有少少風險，但不算太大（因為你只是中年，又不算年齡太大），你可以因應自己的承受程度能力，決定做唔做。
如果你真的想做，不是不可，但加按金額不宜太多，同時可拉長供款期，令每月供樓的支出減少。
你現時有收租物業，應該有正現金流，所得的其實可以用於月供股票，儲資產，策略上對你來說是較好的。$10萬現金買少少優質股（少少就夠，因現時不平），而退休保險就暫時唔好變動。
7.想學睇年報
龔成老師，我想學習自己睇年報，分析間公司，不過很可惜我要照顧小朋友，只係可以在他們的上課時間才有空，無辦法參加你舉辦的課程，有無邊本書介紹我睇？
（ps 如果你能夠在小朋友上學時間開課程就更好啦 ）謝謝
龔成老師：
你可以找找一本別《葛拉漢教你睇財務報表》的書（但未必找到），另外，你亦可睇有關巴菲特的書，都會有部分講下年報的。
年報一個較深的題目，我的股票班都要花一堂時間，去上堂學習當然最好，而你除了睇書外，你都可以自行上網下載一些年報睇睇，自行研究一下。
年報你要睇主席及管理層的講話，了解企業特質，以及前景，然後就是報表上的分析，即是損益表、資產負債表、現金流量表，我地會比較這年與過往年份的變化，然後某些財務指標會比行業比較，以確認這企業的情況，同時，部分財務指標會重點分析，以評估這企業的質素。
課堂方面，要開閒日的早上或下午時間，的確較難，因為我主要睇整體市場，同學們想要甚麼時間，如果太少人想該時間，的確較難開到班。
8.新樓一問
老師，新樓買得過嗎？
龔成老師：
我一向都對新樓有保留，溢價太高。
地點、潛力，優質的，但我寧願會在區內找二手樓。
9.點搵好股票
龔Sir，有野想問你，我依d平時要返工返學當然無乜時間去分析股票，但同時我又覺得想去訓練下自己既選股技巧，令自己可以搵到優質股。
所以想問下如果比如我已經持有4隻優質股，另外再分析左6～7隻優質股，等佢地合理價格買入長渣。咁樣O唔OK？
但咁樣會唔會令自己因為無努力分析埋其他優質股而失去左相應的機會？
總而言之，我地需唔需要為自身已持有的優質股再去分析其他股票，當自身的組合成熟及平穩發展
龔成老師：
當你分析的股票愈多，你的實力不只會增高，同時你手頭上「等買入」的股票更多，當某一隻股票跌落黎，你就較容易把握機會。
我自己手頭上的「等待機會」股票有過百隻，但我的貨只有幾隻，我就是等一個好大的機會，等我可以得到一個最高的回報，才會出手。
你久不久都要分分析翻持有的4隻股。再分析更多股票，6、7隻是不足夠的，鼓勵你花多點時間去析，學習更多。我相信一個月分析一隻股，你都可以應付到的，從這個開始，不停為「等買入list」增加股票，令自己有更多投資機會。
10.持有定賺咗就算
你好呀成，近排我見報紙傳媒已經有多左提股市，是否已經過熱？
我買入的股票約一年至兩年，手上主要有金沙，長建，大快活，澳博，香港電訊，平均都係升左1x%-20%左右。
我明白長線投資，升幅以倍計的概念，以現時情況是否都不用理，照keep就ok?定係都係放少少？
龔成老師：
現時大市的部分版塊，的確有少少熱，但未到全面的狂熱期，整體大市又不算好貴。所以，基本上暫時持有都可以，因為現金不是財富，優質股才是，所以就算一直持有優質股，其實都無問題。
如果你而家已經夠貨，其實可以用「持有」作策略，不買不賣，等待更大的收成，到大市更熱，見到某些股已經嚴重地高估，到時先賣出這些股。
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：facebook.com/80shing
個人網站：80shing.skx.io/
延伸閱讀：
90後有$9萬積蓄 想用$6萬投資錢搵錢
