大劉連爆多個都市傳說|劉鑾雄澄清與呂麗君關係+回應春卷傳聞|一文睇清

投資

廣告

71歲富商大劉劉鑾雄上月在銅鑼灣皇室堡,被途人拍攝到與前女友呂麗君(現改名為呂姵霖)同行,二人在2014年分手後,首次被拍攝到同行。片段一出隨即引起復合傳聞。

大劉有火

大劉今日(1月3日)早上約11時,親自現身銅鑼灣辦公室舉行記者招待會,特意澄清與呂麗君的關係。

記招只讓傳媒拍攝硬照和錄音,不准拍片。期間大劉手持有關與呂麗君同行皇室堡的報道,以A4紙彩色影印。

據報道,大劉發火否認與呂麗君復合。還特意問在場記者:「我講咁耐有冇講過粗口呀?」

平時出入,保鏢均會白毛巾跟身,就記者會現場所見,大劉枱頭備有一疊白毛巾。現場亦有消毒用品及蒸餾水供記者使用。

大劉 呂麗君 大劉今日開記招,撇清與呂麗君的關係。
大劉今日開記招,撇清與呂麗君的關係。(圖片來源:東方新地)

財金界好快通天

被問及呂麗君找大劉何事。大劉回應指呂麗君有事相求,惟拒絕透露所謂何事:

「我真係唔想講,我做人做事係今日留一線、他日好相見,唔會趕盡殺絕,對任何人都係,唔止呂麗君。」

大劉續說:「有留意財經金融地產嘅人好快會知,我就唔方便講,如果唔係為咗仔女,我極度唔想幫。」

大劉指為人決斷,然而這次卻為呂麗君的要求而苦思。他說:「今次幫呂小姐,若果唔係考慮到兩個仔女,一個12歲、一個20歲,我決定幫或者唔幫,平時決定係0.1秒,今次做決定諗咗兩分鐘。

「唔想有難堪嘅事出現而影響細路,為佢嘅仔女保留一點尊嚴,希望記招之後有人收斂啲!好SAD,有啲天生性格到死嗰日都唔會改,唯有黯然接受。」似乎大劉與呂麗君形同陌路。

大劉 呂麗君
(圖片來源:YouTube@Hong Kong Breaking News)

主動回應塞春卷、乒乓球傳聞

對於成了「都市傳說」的塞乒乓球及春卷傳聞。意想不到大劉居然在記招上主動提起。

大劉扯火:「我谷咗氣好耐,最緊要係澄清唔好畀人造謠造非!我好多氣谷谷埋埋,話塞春卷呀、乒乓波、網球呀,點樣鬧人呀,摑人兩巴人哋喊呀,即刻攞張支票掟埋塊面度,我都隨身唔袋支票嘅。」

大劉愈說愈激動:「乜嘢都有人作,啲人唔抵得我搵到少少錢,多幾個女朋友,佢咪踩你囉。造謠造非,遲啲唔係話我塞人,係話我鍾意畀人塞㖭,都得㗎!」

大劉 呂麗君
(圖片來源:YouTube@Hong Kong Breaking News )

李嘉欣、The One恩怨

劉主動提起尖沙嘴商廈The One、以及舊愛李嘉欣的傳言。大劉毫不回避:

「我尖沙嘴有棟大廈The ONE,個名係我個仔 #劉鳴煒 改,我本人喺任何思想任何環境下,都冇諗過The ONE呢個字出嚟,我唔知你哋明唔明白我講乜。The ONE係我個仔改,我本人私人或工作上,從來冇諗過一個字叫做The ONE。」

至於曾於頭版慶祝舊愛生日,大劉回應:「當有啲人想搵老襯,成個廣告板『隊』埋嚟,叫我搵啲秘書登廣告,我都會照幫手。」

「好鬼慘㗎,你哋唔知道,結果嗰個人成功咗,一個The ONE,搞掂咗,我都替佢開心,唔係咁易搵。」

大劉不避嫌提及舊愛李嘉欣,「我係谷咗氣好耐,冤屈氣喺心擺咗30幾年,(今日講出嚟會唔會舒服啲)唔會,不過最緊要係澄清唔想畀人造謠造非,包括女人好、蕭才子好,話我抑鬱狂燥症,話我最愛 李嘉欣或者The ONE。」此刻,未知當時人能否以「恭喜你呀」的心情來消化。

保護妻子及家人

大劉指甘比沒有為此事不悅,他在記招上說:「點值得啫?佢知咩事!」又指若要講及呂麗君的事情「真係講七七四十九日都講唔完,大家要紮營喺到講。」

大劉更回應早年換腎傳聞:「有單嘢寫同陳凱韻,係報恩佢阿媽畀咗個腎我,換腎都搵個後生啲,唔會揀60歲嘅老腎。」

大劉刻意提供財產分佈安排。他擔心很多人會誤會「陳凱韻與家人」,他表示不想外人誤會他所有身家都被陳凱韻全部奪取。當中「家人」可能包括他的子女,除了與甘比陳凱韻所生的3個小朋友,還包括呂麗君的仔女,可能亦包括寶詠琴的仔女。

大劉在記招盛讚大仔劉鳴煒,「我最大個仔今年都42歲,就嚟43歲,到後來呂麗君同陳凱韻生,佢都係最大,佢除咗讀書叻,都好肯好肯做好多善事,呢個係最開心。」

天文數字匯錢給前女友

大劉亦表示仍會「助養」值得他關心的前度,他說:「有啲真係有『助養』,但唔係全部,值得我贊助支持我就會做,唔代表個個係。」

他更透露往事,「我喺兩三年前,匯咗一筆天文數字畀一個53年前嘅女朋友,依家佢都好老,因為值得我就會照顧,但有啲無良心又賤格就唔會,娛樂圈都有唔少呢啲人,好多鬼同魔。」

大劉 呂麗君 大劉與呂麗君昔日相愛時,每星期必去富豪飯堂福臨門用膳。
大劉與呂麗君昔日相愛時,每星期必去富豪飯堂福臨門用膳。(圖片來源:新傳媒資料室)

大劉銅鑼灣皇室堡行街

大劉在片段內顯得中氣十足,與呂麗君同行期間,見到一名「挨柱男」踎在地上倚柱休息,於是厲聲斥責對方,更示意身旁保鏢帶走挨柱男:「走啦,使唔使搵人趕你呀?」其後商場保鏢送走挨柱男,挨柱男準備收拾地上物品。呂麗君

劉鑾雄與呂麗君育有一子一女,二人在2014年分手。大劉與「甘比」陳凱韻於2016年結婚,與大劉育有3名子女,甘比現為華人置業行政總裁及執行董事,是香港女首富之一。

大劉曾發6點聲明

大劉曾於上月31日發出澄清聲明,「對於近日有媒體明示或暗示,意指我與呂麗君(現改名為呂姵霖)復合一事,並非屬實,為免引起大家的誤會。」

大劉 呂麗君 華置趁火打劫?折讓7成出價提私有化 甘比: 將所有風險轉移至我身上、給小股東套現良機
(圖片來源:甘比instagram)

本人 劉鑾雄認為必須要作出以下澄清,以正視聽:

1. 最近因呂小姐有困難,有事相求,本人為免小朋友受到影響的關係,遂與呂小姐達成商業協議。當日呂小姐只是在本人位於皇室堡的寫字樓簽署相關商業交易文件,然後在沒有相約之下一同乘搭電梯離去,並不是呂小姐與本人相約逛商場,在此之前,本人與呂小姐已多年沒有見面。
2. 上述有關交易純屬商業性質,並不構成本人對呂小姐任何財政照顧或支持。
3. 對於近日媒體出現網路打手,故意散佈謠言,不僅誤導公眾,亦對本人及本人家人造成滋擾,本人覺得有必要作出澄清。
4. 本人於2016年與陳凱韻結婚,亦早已將絕大部份名下財產作出處理,以防日後他人作出任何無理訴訟,所作一切無非為保障陳凱韻及家人,避免日後有人為一己私利,興風作浪。

5. 本人重申,本人與呂小姐除了作為小朋友的父母親外,並無任何關係,亦絕對不想有任何關係,請大家不要誤信網路打手不實傳聞,作出無謂的聯想或揣測。
6. 本人自2014年與呂小姐分手後,不相往來,是次作出此聲明,實屬逼不得已,為免他人乘機招搖撞騙。

大劉 呂麗君
(圖片來源:東方新地)

免責聲明:本專頁刊載的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。

圖片來源:YouTube@Hong Kong Breaking News 、甘比instagram