凶宅怨氣難化解？　麥玲玲有計

1. 如何界定凶宅？

香港法律無明確定義何謂「凶宅」，一般買賣亦唔受限制。香港業主會會長佘慶雲表示，地產業界慣性將曾經發生不幸事故嘅物業定義為「凶宅」，舉例有人死亡，包括自殺、他殺、意外身亡等等。

不過部分死亡個案，例如長者係單位內去世，又或者當事人跳樓自殺，因為「離開」單位時並未死亡，該物業或唔會被標籤為「凶宅」；反而某低層單位平台遇到有人跳樓去世，因為該低層單位出現「有人死亡」情況，所以或會被標籤為「凶宅」！

買家可向地產代理查詢單位資料，避免誤購凶宅。

2. 如何避免誤買凶宅？

雖然凶宅一般價錢吸引，不過中國人始終有所忌諱，究竟點樣避免誤買凶宅？佘慶雲提醒買家，一般凶宅定價低於市價，加上部分銀行估價時，會拒絕向懷疑凶宅單位承造按揭，遇此情況買家需要留意。

地產代理監管局表示，根據《地產代理條例》規管下，執業地產代理未必要主動向買家提供凶宅資料。假若買家查詢時，代理要如實解答，否則屬於違反《操守守則》；不過若買家無向代理查詢，或者代理根本唔知情，一般唔算違反守則。

除此之外，買家亦可以問問屋苑保安員、鄰居等等，了解一下單位狀況，而坊間亦有唔少「凶宅網」，部分詳細列出凶宅資料，為買家提供多一重保障。

3. 買入凶宅有乜要注意？

堪輿學家麥玲玲認為，買入凶宅注意事項，要視乎死亡性質而定。如果屬於兇殺個案，一般死者怨氣較重，較難化解；如果屬於自殺個案，或會因為單位內磁場等「先天不足」問題，容易令住客病倒或遇到意外，一般可透過裝修轉換磁場，或者有宗教信仰而令心中平安；若果買家難過心理關口，可考慮搬離單位，甚至租畀有唔同磁場嘅外國人，因為「雞同鴨講」搞唔到佢地。

堪輿學家麥玲玲認為，若買家購入凶宅後感到心理不安，可考慮搬離單位。

4. 農曆7月睇樓須知？

至於踏入農曆7月俗稱「鬼月」，會唔會不宜睇樓呢？麥玲玲認為，一般睇樓會帶小朋友及寵物前往，睇下佢地反應，買家亦可感受單位會唔會舒適；由於有啲單位空置太耐，人氣較少，能量較低，容易令人唔舒服，睇樓可以考慮配戴宗教物品化解。另外，日落後根本睇唔清周邊環境，所以要避免夜晚睇樓！

相關報導：
【農曆7月又到　凶宅五大賣點】 http://goo.gl/FplWLH
【伊利莎伯大廈凶宅　低市價30%放盤】 http://goo.gl/qAAGMP