華懋荷包爽 CEO 約滿後起身｜凍鏈茶專欄
廣告
新世界(0017.HK)宣布以40.2億港元將荃灣愉景新城商場加停車場全部權益賣俾華懋。發展商喺高息環境之下陸續賣產減債，而新世界2024目標之一，就係賣走80億元非核心資產，今次一鋪就達標五成，算係預計之內。而華懋係荃灣地膽，買返荃灣嘅嘢，都算合理。只係咁嘅市況之下，新世界都唔使劈價，相比2010年底購入50%權益時，購入價約13.8億元計算，愉景新城商場加停車場總市值約27.6億元，今次交易，新世界賬面仲賺約13億元。
華懋呢幾年都「荷包爽」。2018年華懋為咗插旗安達臣道新發展區，以31.1億元貼近市場估值上限，擊敗24個對手奪得新樓盤安峯現址地皮，每方呎樓面地價約1.2萬元，貼近市場估值上限。2021年，又夥拍希慎(0014.HK），以197.78億元中標銅鑼灣加路連山道商業用地，每方呎樓面地價約1.8萬元，高於市場預期。
華懋現時資產已經升值到1,500億元以上，拍得住大型發展商。不過，管理方面就無眼睇，始終又唔係上市公司，又唔係私人企業。以安達臣道為例，本來樓盤安峯投資額45億至50億元，用兩萬幾蚊呎推出市場，不過買入之後，政府就將六幅位於安達臣道嘅私樓地皮改劃為資助房屋用地。豪宅地變公屋地，梗係影響安峯銷情，推出以來賣得3伙，最後買家更加全部撻訂離場。所謂無比較無相害，誠哥兩年後喺同區，用每呎樓面地價4,546元投得地皮。
圖片來源：patreon@EDfattogether
