做咗呢件事 講埋Sorry都冇用 老海鮮：點解新嗰代人可以咁有性格？

帶咗飯點解唔可以留夜晚先食

該網民在FB專頁「奴工處」發文，直指「或者你可能覺得我老海鮮，但不得不說上一代嘅人情世故再好難係新嗰代人搵到，尤其愈近千僖年出世嗰堆，新入職第一日，正常都會同同事食飯，但我經常聽到嘅係『我帶咗飯SORRY』」。

該網民繼續勞氣表示，「其實帶咗飯點解唔可以留夜晚先食，又或者覆句不如聽日再一齊食都得啩！真係唔明而家嗰代嗰套獨行獨斷、獨來獨往，唔係話要你埋堆，但係大家同事，除非你打算返幾日就走，如果唔係唔係要對一年都對大半年，點解可以咁有性格？」

坐喺度戴耳機拎利是

此外，該樓主續指，「再講，新年期間大部分同事都企起身打招呼拎利是，點知一個二個後生仔坐晒喺度戴埋耳機同老細拎利是，唔講重以為班97後係老細添，唉！」

帖文一出，隨即引來網民瘋狂討論，大部分網民都認為拎利是的部分是新人不對，但帶飯食不埋堆那部份，除了有少部分網民撐樓主，指「呢一代人，好多時將人情世故、禮貌、尊重、溝通等，通通撥入『奴性』」之外，大部分網民幾乎一面倒撐新同事。

Office最衰就係呢啲埋堆野

• 「如果你真係咁識人情世故，就體諒下人地，而唔係強迫人地跟你果套。」
• 「呢個世界有好多唔同性格既人，去到陌生地方拘謹係好自然既事。你老ＸＸ係應該帶住佢地幫佢地去慢慢等同事適應新環境，而唔係一野就批判公審。尤其辦公室，防人之心不可無，就係太多出面老ＸＸ昆d新人搵佢地笨，佢地先會一黎就築牆。你要努力同時佢都要努力，雙向的。」
• 「做office最衰就係呢啲埋堆野。明明唔啱嘴形都要夾硬一齊食飯，冇野搵野黎講！其實唔係個個都咁外向。」
• 「我帶左飯，點解為左你地，夜晚食？你地邊位，打工咋，同你有親咩？夠鐘就岀糧啦。」
• 「D老ＸＸ鍾意玩埋堆，你第一日返工同大家食飯，其實就係俾班ＸＸ揀下俾唔俾你埋堆，
• 哩D文化等佢過時啦。」
• 「係有心歡迎新同事ge，做上司又好，唔同部門都好，打個招呼，或者講句有咩唔明就問我啦，已經好夠架啦。」
• 「我都係80後老seafood，但係⋯⋯你都ＸＸ㗎喎，Lunch我私人時間做乜鳩要應酬你？快快手食完瞓下好Ｘ過啦。」

「講到帶左飯都已被好婉轉咁拒絕你啦，都懵盛盛，仲話個飯留返夜晚食喎，咁我拎嚟拎去貪過癮咩，唔講聽日再一齊食咪即係唔Ｘ想同你食囉大佬呀，醒小小啦⋯⋯」

避免無謂嘅是非同交流

• 「食飯係個人選擇，點解一定要同大家食？點解一定要埋堆？」
• 「我可以用自己經歷話你聽，我返呢份工第一日就埋咗堆，同人食飯，而果班就係之後跣我出賣我兼唱我嘅人渣。」
• 「避免無謂嘅是非同交流，醒目。」
• 「食飯唔覺得有問題，唔想同啲唔熟嘅同事食飯，或太多交流，咁咪帶飯，好正常，自己食飯仲舒服。」
• 「係呀，你老海鮮，好多管閒事仲將自己果套較硬套入人地果度果種。」
• 「因為時代已經唔同左，新一代好多都係打風流工，同埋現時社會向上流既機會少左好多，新一代覺得與其咁辛苦，討好老細，又唔一定加到人工，咁不如自己開心就算。」
• 「帶飯真係唔關人情世故嘛⋯⋯？出街食一來無咁健康，二來都要錢。佢有你份人工同職位，放工又有錢有時間去做下運動平衡返，或者都會多啲出街食。」
• 「其實，你咁有人情世故，可以試吓同佢講，聽日你請客，睇下佢係咪真係繼續帶飯。btw 人哋可能真係唔想同人食，真係未必關人情世故嘅事。」

「我都覺得第一日唔應該帶飯囉…唔係話一定要同同事食，而係間公司有咩唔對路，襯食晏時間就走人。」

延伸閱讀：港女搵工火速收到offer HR私下提醒「有伏」：其實係唔係佢哋鬼打鬼？

延伸閱讀：Luna爆煲｜美證監揭Terra詐騙黑幕 創辦人Do Kwon套現8億下落不明