深之都 25 萬開拍 蝕 64% 紀錄 2026 年香港劏舖市場的崩潰現狀 劏場大王近年自身難保︳凍鏈茶專欄
近日深水埗長年死場「深之都」，有個劏舖拎去拍賣，開價只係25萬！要知道25萬連新界一個車位都買唔到。不過先唔好興奮，以為用25萬做業主都唔錯，呢類所謂「筍盤」其實係個墳墓。原業主2023年用 70萬接貨，唔使兩年，而家開價25萬要跳樓蝕64%。
每個月都在倒貼
你以為得深水埗係咁？尖沙咀一樣血流成河。好似首都廣場，商場一樓5個舖位年初淪為銀主盤，最終僅以170萬元打包售出。原業主南海國際航運於2013年零售高峰期斥資逾2,500萬元購入，持貨12年賬面蒸發2,300萬，蝕幅高達93%，差啲渣都冇。而同一個場早前亦出現10萬元成交個案。
今年初已出現劏場舖以手袋價或手錶價開盤拍賣，如灣仔「腦場」298，同埋旺角荷里活中心，都有劏舖以10萬元開價拍賣。呢啲舖丟空足有十年，每個月仲要倒貼管理費、差餉、冷氣費。呢啲唔係資產，而係吸血鬼。
從魔術手到泥菩薩：尹柏權與他的「傑作」
當年炒家尹柏權係呢個場嘅「魔術手」，喺劏場拆售高峰期，呢類納米舖呎價曾癲到 每呎3.6萬。講返呢位「劏場大王」尹柏權，唔止首都廣場，荃灣地皇廣場、荃立方通通係佢「傑作」。不過「大王」近年自身難保，佢曾被搜出屋企藏毒，再自爆老婆兩度紅杏出牆，個仔自殘，搞到佢壓力爆煲要吸食可卡因。「大王」自己都泥菩薩過江，佢揸住嘅旺角西洋菜南街地舖，兩年幾前都要慘蝕7,420萬離場，輸足一半。連地面「金蛋」都爆蝕，大家仲敢掂佢搞出嚟啲劏場？最近差餉物業估價署公佈，成個商舖空置率已升到12.5%，係四十年嚟最核突紀錄。連地舖都吉到你怕，你仲妄想有人接你個豆腐膶劏舖？市道好嗰陣都做唔起，依家北上消費熱潮，更加唔使旨意翻生，呢類劏場可以蓋棺了。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
