我人工$20,000 阿哥月入$15,000 但佢係人生贏家 因為…… ｜網民熱話
撰文：Purple弟弟｜ 圖片：電視截圖、新傳媒資料庫、unsplash
人工低 難儲錢
但出得嚟社會做嘢愈耐，發覺做嚟做去都係咁上下，有時仲要OT都幾辛苦。
錢方面唔係儲唔到，係儲嚟都無目標，我月儲$8,000至$10,000，想儲$100萬最快都要8年半！
仲要假設果陣仲有$100萬做到首期嘅樓，真係人都癲…
讀好書不如識好女仔
直至我參考我啊哥嘅人生，我發覺讀好書不如中學識個好女仔！
我啊哥佢中學已經識咗依家女朋友，雙方一直以置業為目標，兩個人大學畢業前做part time已經儲落十幾萬。
出到嚟社會工作，佢同女朋友固定要各儲$7,500落聯名戶口。
27歲儲到過百萬首期上車！
儲落呢筆錢仲會買下港鐵、領展呢啲藍籌股，佢依家27歲已經同女朋友儲到過百萬首期上咗車！
當然我唔係傻嘅，見到啊哥呢個成功例子，我當然識做啦！
所以都好主動參加唔同活動結識異性，但已經識唔返一個肯同自己共同儲蓄嘅伴侶。
有好女友先係人生贏家
咁又係嘅，由於我啊哥中學就識佢女朋友，有足夠時間培養感情。
而我一拍拖就問人肯唔肯同我儲錢買樓，相信要對方係傻嘅先會話好！
依家23歲人先開始拍拖，使費又大咗，仲要唔知同女朋友可唔可以發展順利。
如果比我人生返返去中學，我一定會學我啊哥咁，識個好嘅女朋友長相斯守先係大贏家。
你可以話我垃圾！將樓呢樣嘢睇得咁重，但你估我想㗎咩？
香港地男仔無樓，人哋點放心交個女俾你？自己退休租樓仲頂唔頂得住？
If you can’t beat them join them！
我惟有努力加入做業主行列啦…
相關文章：90後樓主唔加班：OT唔等於熱愛份工「靠OT先升嘅公司早走早著」｜網民熱話
【加班・網民熱話】對於加班、OT這個辦公室文化，你有甚麼看法？最近一個名為「我90後真係唔知咩叫辦公室文化」的帖文引起網民熱烈討論，樓主準時下班，卻被同事斥指不懂辦公室文化。對此，有網民撐「樓主正確態度」，亦有人覺得樓主不加班，可能會得罪上司，甚至影響前程。
撰文：Smart ED編輯部｜圖片：電視截圖、unsplash｜資料來源：討論區
90後樓主：唔知咩叫辦公室文化
樓主提到，自己早前上班，工作一段時間後覺得很累，於是去飲水休息，不足5分鐘的時間。誰知卻遭到年資較長的同事訓斥，「你都休息左（咗）幾耐，諗住休息到幾時」。
另一方面，樓主上班是朝九晚六，但同事卻做到9時才離開。有一日，同事問：「咁多野做，你一日做哂？」樓主回應：「做唔哂咪第二日做」同事反問樓主懂不懂辦公室文化，樓主覺得十分無奈，直言「真係唔多明咩辦公室文化係咩」，認為自己準時走，不代表不熱愛工作；反之，「開OT既（嘅）同事又好鐘意份工咩。
為無謂的文書工作而加班？
樓主觀察所得，其實同事加班是因為無謂的文書工作，變相增加了工作量，「無謂既野又要上，重要既野又要上，搞到哂個工作量好多」。樓主直言，「放工之後既（嘅）時間係自己」，如果付出少許時間幫公司沒問題，但用2至3小時「無私奉獻比（畀）公司，我不如打多份PT」。
網民：準時返準時走 不加班不扮工
樓主的言論引起不少網民討論，當中有不少網民都支持樓主的看法，「樓主正確態度」，「由我哋呢代做好規矩，準時返準時走」，認同不需加班、「扮工」，「啲人（同事）扮工啫，無野做都坐到八九點走」，又有人指，加班、「扮工」不代表有效率，亦不一定獲得上司讚賞，「老細升人從來唔係睇邊個ot多，靠OT先升既（嘅）公司早走早著」。
OT一係自己能力有問題，一係呃OT錢/搏升職，一係就公司管理有問題/度縮
不加班會得罪老闆？
另一方面，有人提醒樓主，準時走是沒有問題，但可能會影響上司對你的觀感，甚至是職場的前途，「contract點寫你咪點做，但風險係你會得罪老細（老闆）」。
不過如果我係你老細你上司嘅話，將來有機會升職加人工唔會第一個考慮你先囉，蝕底嘅最終係你自己啫，正所謂條路自己揀，到時唔好問人點解升佢唔升你，點解加人工人哋會加得多過你
加班加得其所 對前途好？
有人以自己的經驗作例，指加班加得其所，對前途很有益處。該網民指，「事業緊係趁後生博，當你老左已經唔會再有動力去做」。
我2年前FG，同期有兩個都係FG，我OU，佢地3大，我日日OT到9點，佢地就6點幾走人。 結果我第一年12,000+到18,000，佢地16,000，第二年我18,000 去到24,000，佢地19000，老細特登就係睇到我夠哂博！對d老細黎（嚟）講，你同佢地講做哂都無用，佢地淨係睇你O唔OT、勤唔勤力
肯搏肯捱才是出路？
有網民認同以上網民的看法，指現時「肯搏肯捱，對公司有loyalty，對工作有commitment，做得嘢之餘又humble又唔怕do extra嘅後生仔，而家相對真係買少見少」，所以認為他們更易上位。亦有網民提到，將心比己，如果自己是高層，當然想「用蔗渣嘅價錢做出燒鵝既味道」。如果要請人，即是要多花錢，如果在不多花錢的情況下，其實高層能減程序、減工作量，例如是撰寫無謂的Email。
有人指出，在工時這方面，「藍領工」比「白領工」來得公平、「均真好多」，起碼沒有或很少不明文規定每日硬性OT。只要完成當日工作，隨時還能提早離開收工。
