我的男友做IT 7個令我心疼的難處

職場

廣告

我想借個地方吐吓自己做咗幾年IT人嘅苦水。我哋同行之間大家都好清楚,行外人個個叫我哋做IT狗,我哋惟有將佢理解為做到隻狗咁嘅意思,因為我哋咩都要做,好大壓力,但又被視為最低價值。

1. 萬能KEY

雖然叫做資訊科技支援部門,但大部分同事都只睇到「支援部門」四隻大字,電腦有問題搵IT、影印機JAM紙搵IT、FAX機唔識用搵IT、電掣無電到搵IT、電視有雪花搵IT、連門口個密碼鎖有問題都走嚟搵IT,好似永遠都分唔清咩嘢畀IT做、咩嘢畀Admin做咁。

2. 積勞成N疾

內地有句咁嘅說話形容IT人嘅工時情況:「上班比雞還早,幹活比驢還多,下班比『小姐』還晚。」講到明IT人,讀書嗰陣已經成日對住部電腦,到返工就梗係對住部電腦更長時間,加上宜家連智能電話都IT範圍,所以係連搭車都要望實個MON,結果眼鏡變成IT人嘅特徵,仲長期眼乾。又再加上成日坐喺度硬晒軚咁對住部電腦,郁都唔郁,一年復一年後好易有三高問題甚至係頸椎、腰骨嘅毛病。

除咗生理病,我哋工時長而且乜都要做,又成日驚畀人炒,搞到好多同行都有壓力過大嘅問題,失眠就碎料,大鑊啲仲患上抑鬱等等心理病,簡直係用生命嚟換雞碎咁多錢。

3. 美貌受損

近視愈嚟愈深,鏡片愈嚟愈厚,眼球愈嚟愈凸。

壓力得加無減,用腦過多無得放鬆,頭髮都有甩無生,地中海不斷淹沒鄰近地區…… 🙁

有人話好仔唔做IT,好女又唔吼IT,同行又無乜IT女,無女士為我哋增添打扮嘅動力,令情況更加…… 唉不要再說了。

4. 後浪如海嘯

科技嘅嘢日新月異,每年嘅新人都係帶住最新嘅知識嚟,令我哋班老鬼收工都不得不去進修吓,永遠唔知要讀到何年何月先可以穩保個飯碗。

如果你係老鬼睇住啲新人入嚟,佢哋都可能會俾返幾分薄面你尊重吓你,但如果掉返轉做咗幾年先嚟轉工,班後生除咗同你有代溝,仲往往都睇你唔起,以為你係盲字都唔識多隻嘅活化石,嗰種心理落差唔係人人都頂得住,所以IT人一安定咗就好少轉工,寧願畀人壓價。

5. 專業被輕視

都係嗰句,科技嘅嘢日新月異。除咗基本知識,上年考返嚟嘅cert可能今年已經無乜用。但作為IT人,你一定會好珍惜自己過往考返嚟嘅每一張cert,因為每一張都係用青春、汗水、心血、頭髮、視力換返嚟,得你同你嘅同行知道你嗰一張cert嘅意義係幾咁深、考到有幾咁巴閉。亦只有IT老鬼先知道十幾年前嘅一張Computer Science學位證書係需要AL幾個A嘅人一齊爭崩頭再捱過三年無數嘅通宵先換到返嚟嘅成果。

但宜家街上一地都係CS嘅Degree、Asso、HD,令成個社會對IT嘅眼光已經唔同晒,好少人識得尊重我哋嗰疊血汗成果,特別係宜家喺職場橫行霸道黑口黑面偉論多多嘅HR。佢哋簡單一句「呢啲唔洗俾我睇」就足以令你心中怒火焚燒七七四十九日。

6. 缺乏薪金議價力

又係因為嗰句科技日新月異,每年都有新人入行,每個新人都可以取替你嘅工作,公司好似可以奉旨唔加人工俾你,一有咩事就炒咗你請過個價廉物美嘅Fresh grad。有位朋友年約30,仲渣住個CS嘅碩士,一樣做到隻狗咁,但係只換來20K左右嘅人工。又有位朋友30中後嘅朋友,賣命咗10幾年,都只係得26K。

之前大陸手機公司XX炒咗班幫佢哋打咗10幾年工,年齡34歲以上嘅程式員,嗰篇報導話:「30多歲的程式員不能熬夜,失去激情,30多歲的程式員成本太高,性價比太低。」

唔好以為商場上只有佢咁諗,事實係得佢一個咁老實講出口,大部分奸商都賤視IT人,如果唔係點解一有咩事都係搵IT開刀先啫?

所以呢,好仔除咗唔當差,亦唔好當IT狗……

延伸閱讀:向每個打工仔致敬 護士教師社工各有各辛酸

呢三個行業,好多人都想做,表面以為好筍好舒服,其實行內人有苦自己知。有幾辛苦,大家睇睇:

護士篇

適逢流感高峰期,公立醫院求診人數爆晒煲之餘,亦到咗媒體大爆醫療事故事件嘅季節。近日市民成日俾人將換錯心、開錯腦、斷錯症、醫錯人嘅資訊硬生生塞入個腦度,作為醫護人員,想你哋停一停、聽吓我哋氣弱浮絲嘅解釋。你唔一定要原諒,但我懇求你哋加一分體諒。

 

一 流失率有增無減

我哋睇返啲數字,公立醫院護士2015-2016年度流失率創三年新高見5.2%,其中港島東醫院聯網嘅流失率仲高達6.5%,高處未算高,威爾斯嘅內科護士流失率仲達到9.3%添。

 

做呢行嘅大家都明,有番幾年年資、份人現實少少都唔會想喺度捱騾仔啦係咪?但係走咗咁多人,又唔係即刻請返咁多人,甚至側側膊cut人,我哋嘅工時同工作壓力都直線上升,而補假仍然無時間放。如果醫護嘅工作壓力係一隻股票,呢隻股實令無數人發達上車。

 

二 年資淺醫護比例增

上面講到流失率高,入嚟替工嘅只有fresh grad,年資淺自然無咁幫得手,呢個我哋個個都經歷過,當然唔會怪新丁,但變相請咗人都唔會幫輕到我哋好多,嗰種辛苦同崩潰真係非筆墨所能形容。

 

仲要我哋班比較年資深嘅,要做自己嘅海量工作之餘,又要湊住班細,又要幫手帶住成team人,唔係個個multi-tasking都仲係可以做到樣樣perfect,更何況近年嘅病人同家屬都mean咗好多。

 

三 護士「出身地」多元化

醫護人員係相當講求合作性嘅工作,但近年多咗好多唔同嘅護士學校,大家在學時嘅模式都可能有些微分別。對於醫護人員嚟講,差少少就係差少少,嗰少少都需要我哋之間花多一啲時間去培養大家之間嘅默契,而我哋成日都忙到甩晒轆,同事流失率又高,每個醫護成日都要part唔同人,又要重新適應,無人可以否認呢種制度令到出錯嘅風險增加。

 

四 出小錯都會被無限放大嚟講

唔係每一單醫療事故都100%可以避免,但每一單涉嫌係醫療事故嘅事件都會被放大好多倍討論,引致近年病人同家屬乜都嗌特敏福嘅現象。

 

有啲主流意見一邊承認醫護人手嚴重唔夠,一邊又怪責醫護無責任心無道德,只輕描淡寫帶過醫管局嘅管治責任先係問題根源,我想問吓講呢番話嘅人到底係咩居心去抹黑醫護嘅專業形象?我哋個個都過五關斬六將先就位,如果真係咁無責任心又無道德就一早走咗去搵藥廠工啦,你咁講一講,你知唔知對我哋醫護人員有幾大嘅心理傷害?我哋嘅士氣會有幾低落?

 

其實大家可唔可以,喺有醫療事故時,唔好淨係質疑我哋嘅專業,對準少少cut budget嗰班、同埋我哋管理層整出嚟嘅呢一套制度?我哋受靶受到好攰,唔好做管理層嘅祭品之餘,仲要做埋社會嘅箭靶。

 

社工篇

 

社工,唔止得駐校嗰一種,其實好多人都唔知社工係做乜,個個都以為社工係坐冷氣房齋搞文件,但其實社工就係社會上最大嘅磨心。因為你會見住最需要社會資源嘅人得不到應有嘅援助,但貪婪無道嘅人往往最識玩社會嘅灰色地帶奪走人哋嘅資源。做呢行,EQ梗係要有,仲要識得調節自己嘅心理,接受吓呢個世界嘅不公。

 

社工嘅日常最常面對嘅當然唔係真正有需要嘅人,而係以下呢三類。

 

1. 乜都話唔識又要惡

今時今日對社福資源「需」求最大嘅係邊一類人,相信大家都好清楚,我都唔講咁白。

 

以前嘅求助人士都會努力講我哋嘅母語配合我哋,但依家嘅求助人士覺得自己先係dominant,我哋打工嘅就一定要配合佢,聽見我哋唔同佢講佢嘅語言或者講得唔好,就會直接鬧爆我哋。好多同事已經慣咗一嚟就轉channel,但「客戶」仍然會係咁話「聽唔明」嚟博大霧。

成日叫佢哋帶齊啲文件,十次有九次都無帶,次次都話我哋無講清楚或者佢哋之前都聽唔明,成日都將個波卸落我哋度話「你哋唔係會幫我搞掂晒架咩?做乜要我做咁多嘢!」

 

腥笙笑者,個幫字有個譜架,有啲嘢我哋真係幫唔到你,例如拎銀行信咁,牽涉私隱問題嘅嘢要你自己做,點先講得你明?

 

2. 今日申請聽日催

無論係申請綜援定公屋,都係需要極長等待時間嘅工作,特別係申請公屋,港人分分鐘要等十年,而我哋嘅「客戶」通常都比港人快,你懂的。

 

但係佢哋係唔會理自己已經比一般人優先咗,今日申請聽日就催你幾時有屋住幾時有錢收,政府做嘢明明出晒名慢架啦,你想我點啫,你唔敢嘈政府就走嚟嘈我,三日唔埋兩日就走上嚟嘈話自己好趕。趕?大把住劏房嘅香港人仲趕呀!你呢啲大陸有地方住、純粹想多間屋嘅人憑咩話自己趕呀?

 

3. 穿金戴銀申請綜援

政府嘅社福政策不嬲都有漏洞,「客戶」喺香港以外嘅資產我哋無權過問,但成日都有一兩個蠢材會唔小心漏咗口風話我知喺內地有幾廿層樓收租,但我哋無辦法因為香港以外範圍嘅嘢,所以都係要死死地氣照幫佢做,而呢啲情況對於新入行嘅fresh grad嚟講真係好難受,i know that feel bro。

 

但最難頂嘅係有啲人會穿金戴銀嚟申請綜援,一副「係呀我幾百萬喺大陸但你吹得我漲咩」咁嘅樣,財大氣粗呼喝你做嘢幫佢申請每個月對於佢嚟講係雞碎嘅援助金,面對咁貪得無厭嘅人,都只有默默地做,但真係… 好想喊覺得個社會好唔公平。

 

每日做呢啲都已經令我哋抖唔到氣係咁OT,又點會唧到時間出嚟觀察呢個社會?每次有倫常案件都鬧社會福利署淨係識幫人呃綜援嘅你,不如幫我哋諗諗可以點樣改變呢個社會上社工嘅角色同工作內容。

 

老師篇

成日都聽見老師制度上嘅辛酸,但小妹初為人師後,發現除咗制度上,仲有啲唔知好嬲定好笑嘅枝節,好想同大家分享吓。

 

記憶宮殿的考驗

喺工作以外嘅時間同地方,一見到家長就預咗要應酬返一段或長或短嘅時間,家長們都覺得呢樣係我哋份工包埋嘅,所以隨時隨地都有準備OT嘅需要。

 

但我勢估唔到呢一啲相遇會發生喺香港以外嘅地方T_T

 

當時我仍未婚,同男友到北海道度聖誕,因為貪方便關係就跟團去。點知個團入面有半團人都係我一個學生嘅家人、親戚、朋友。我係教Art的,亦教好多班,如果唔係個學生叫我我都唔認得佢…

 

結果喺五日四夜嘅行程,一坐埋食飯就被問呢位學生平時喺學校嘅表現--同一個問題、唔同嘅人… 我同男友都要表現得相當避忌,令呢趟旅程變咗五日共120小時嘅間歇性OT。但重點係,教咁多班,其實我真係對呢位學生無乜印象啊天啊T_T

 

順個便,做埋我個仔工人吖

以前見到一個中學生畀書包父母拎,一定會成為一間學校上上下下引以為恥嘅大新聞,但依家呢個世界好似已經習慣咗呢一啲畫面。

 

有次返學時撞到一個初中年級學生同佢幫佢咩住書包嘅媽媽,之後一齊行,當然少不了要傾吓小朋友喺學校嘅情況。過咗條馬路佢媽媽就話要走喇,但喺呢一刻佢做咗個動作--將個學生嘅書包遞咗畀我,等我接。我當堂呆咗唔識反應,佢見我無動於衷,就話:「佢個書包好重,麻煩miss你喇。」

 

結果我冒住被人投訴嘅危機拒絕咗,好彩事後都無畀人找悔氣…

 

要跑數的老師

我唔係講緊要罰幾多人留堂或者缺點嗰種跑數。近年好多學校嘅校舍都開始舊,但學校營運budget又唔夠,所以就要籌款。

 

講起籌款就諗起以前讀書嗰陣,小妹都試過畀班主任軟硬兼施咁逼自己捐多啲錢,仲試過因為成班夾埋個金額比隔離幾班都低,班主任抽上堂時間鬧咗我哋成鐘,鬧到佢自己都喊埋出嚟咁,結果唔夠時間教書,就要補堂。

 

以前籌款頂多出張通告畀各位家長填數、簽名、畀錢就成事,但唔知點解近年班學校元老越諗越多花臣… 例如係開放日賣啲成本5蚊但售價100蚊嘅環保袋、絕對唔等洗嘅飾品(轉頭又要上堂教學生分清楚Need同Want=_=)、又或者搞咩周年晚宴,叫啲舊生參加,收人哋每人可以喺酒店食自助餐嘅價錢去食酒樓飯咁… 說到底都係搏你念舊,就算唔合理都會畀咁。

 

小妹好不幸,成為咗學校嘅籌款專員,除咗要集合上述奇奇怪怪嘅籌款概念再實行出嚟之外,仲要做埋sales,因為高層已經set咗個target叫我加油(潛台詞應該係:做唔到嘅話下年就唔同你續約)。所以我就要係喺開放日上,企喺嗰啲「精品」枱前,不斷游說前來嘅學生、舊生、家長、嘉賓買… 諗返都覺得丟架,明明我係老師嚟架!

延伸閱讀: